II Нацыянальная тэатральная прэмія

Аб’яўлены Міністэрствам культуры Рэспублікі Беларусь сумесна з грамадскімі арганізацымі “Беларускі саюз тэатральных дзеячаў”, “Беларускі саюз літаратурна-мастацкіх крытыкаў”, “Беларускі саюз кампазітараў” конкурс тэатральнага мастацтва “Нацыянальная тэатральная прэмія” выклікаў сёлета яшчэ большую зацікаўленасць прафесійных тэатральных калектываў краіны, чым у мінулым годзе.

На ўдзел у першым – адборачным – туры ІІ Нацыянальнай тэатральнай прэміі ад прафесійных дзяржаўных і прыватных тэатраў краіны на сённяшні дзень ўжо паступіла 37 заявак, якія прадэманстравалі багацце і разнастайнасць рэпертуарнай палітры  беларускіх тэатраў.

Амаль палова з заяўленых на ўдзел у Нацыянальнай тэатральнай прэміі 2012 года спектакляў – гэта спектаклі па творах класічнай і сучаснай беларускай драматургіі. Сярод іх такія як: “Выкраданне Еўропы альбо Тэатр Уршулі Радзівіл” Ф.У.Радзівіл, С.Кавалёва Нацыянальнага акадэмічнага тэатра імя Я.Купалы; “Пане Каханку” А.Курэйчыка Нацыянальнага акадэмічнага драматычнага тэатра імя М. Горкага; “Леаніды не вернуцца на зямлю” У. Караткевіча Нацыянальнага акадэмічнага драматычнага тэатра імя Я. Коласа з г. Віцебска; “Пан Міністар” Ф. Аляхновіча Беларускага рэспубліканскага тэатра юнага гледача; “Аднакласнікі” Ю. Чарняўскай і “Камедыя” У. Рудава Магілёўскага абласнога драматычнага тэатра; “Раскіданае гняздо” Я. Купалы Палесскага драматычнага тэатра г. Пінска і Брэсцкага акадэмічнага тэатра драмы імя Ленінскага камсамола Беларусі шмат іншых.

На суісканне Нацыянальнай тэатральнай прэміі таксама прадстаўлены спектаклі па класічных і сучасных творах замежных аўтараў: опера “Аіда” Дж.Вердзі і балет “Сільфіда” Х.Левенсхольда Нацыянальнага акадэмічнага Вялікага тэатра оперы і балета Рэспублікі Беларусь; “Шанц, якога чакаешь усё жыццё” В.Алена Новага драматычнага тэатра г.Мінска; “Сродак Макропуласа” К.Чапека тэатра-студыі кінаакцёра Нацыянальнай кінастудыі “Беларусьфільм”; “Палёт над гняздом зязюлі” Д.Васэрмана Гродзенскага абласнога драматычнага тэатра; “Кароль Лір” У.Шэкспіра Брэсцкага абласного тэатра лялек; “Гаральд і Мод” Ж.-К.Кар’ера Палесскага драматычнага тэатра г.Пінска і шмат іншых.

На ўдзел у Нацыянальнай тэатральнай прэміі заяўлены таксама спектаклі па класічнай і сучаснай рускай драматургіі: “Пікавая дама” А.Пушкіна, П.Чайкоўскага Гродзенскага абласнога тэатра лялек; “Гора ад розуму” А.Грыбаедава Нацыянальнага акадэмічнага драматычнага тэатра імя М.Горкага; “Бяда ад пяшчотнага сэрца” Ф.Салагуба Драматычнага тэатра Беларускай Арміі; “Сабачае сэрца” па М.Булгакаву Гомельскага дзяржаўнага тэатра лялек і шмат іншых.

У бягучым годзе з прадстаўленых заявак на суісканне Нацыянальнай тэатральнай прэміі таксама прадстаўлена 8 спектакляў для дзіцячай аўдыторыі: прыблізна па адным спектаклі ад кожнага тэатра лялек абласцей і два дзіцячых спектакля ад тэатраў драмы. Гэта выклікана з’яўленнем новай конкурснай намінацыі, ўпершыню з’явіўшайся ў гэтым годзе ў пераліку конкурсных намінацый Другой Нацыянальнай тэатральнай прэміі – намінацыі “Лепшы спектакль для дзяцей”.

Усе спектаклі, якія вылучаны тэатрамі на ўдзел у першым – адборачным – туры Нацыянальнай тэатральнай прэміі 2012 года можна будзе праглядзець у тэатрах краіны падчас адкрыцця новага тэатральнага сезона ў верасні-кастрычніку бягучага года.

З адабраных адборачнай камісіяй спектакляў будзе складзены шорт-ліст намінантаў, якія пакажуць свае спектаклі ў Мінску з 12 па 19 лістапада на тэатральных пляцоўках горада, і з якіх і будуць па выніках дадзенага прагляду вызначаны пераможцы Другой Нацыянальнай тэатральнай прэміі.

Адбор спектакляў для ўдзелу ў конкурсным тыдні адборачная камісія Нацыянальнай тэатральнай прэміі распачне праглядам спектакля Сучаснага мастацкага тэатра Уладзіміра Ушакова “Фігара.tut” па П.Бамаршэ ужо 28 жніўня 2012 г.

У склад адборачнай камісіі Нацыянальнай тэатральнай прэміі ўвайшлі мастацтвазнаўцы, крытыкі, вядучыя дзеячы тэатральнага, музычнага мастацтва, прадстаўнікі творчых саюзаў Беларусі. Узначальвае камісію Аляксей Дудараў  – старшыня грамадскага аб’яднання “Беларускі саюз тэатральных дзеячаў”.

Заключная цырымонія ўзнагароджання пераможцаў адбудзецца 19 лістапада.

Даведачна:

У 2011 годзе на ўдзел у Першай Нацыянальнай тэатральнай прэміі прафесійнымі тэатрамі краіны было пададзена 27 заявак, у тым ліку 26 ад тэатраў дзяржаўнай формы ўласнасці (у тым ліку 21 – ад рэгіянальных тэатраў), 1 – ад прыватнага тэатральнага калектыву.

Намінантамі прэміі сталі спектаклі 15 тэатраў.